Bere jaiotzatik (1922), beharra etengabeko bidelagun eta gosea noizbehinkako bisitari izan zituen Paulo Freire pedagogo brasildarrak. Bere amak -alargun adoretsua- ez zuen lan makalik egin Recifeko txirotasunean seme gazteenari ikasketak eman ahal izateko. Alabaina, ikasketa horiek ezinbestekoak ziren handik urte mordo batera munduko milaka alfabetatu gabek jakintasunaren egarria aseko bazuten.

- Paulo Freireren haurtzaroa _____________________________________ .

Lege araudietan barrena sarturik, Zuzenbide ikasketak burutu zituen Paulo Freirek 40ko hamarkadan. Hala ere, gazte garaietan jada hezkuntzarako joera eta prestakuntza bereziak erakutsi zituen, eta dohain nabarmen horiek lantzeko bidea aurkitu zuen Elsa Maia de Oliveirarekin ezkondu zenean. Emaztea irakaslea zuen, eta hark bideratu zuen pedagogian barrena. “Emazteari zor diot hezkuntzan aritu izana” onartu zuen behin baino gehiagotan.

- 40ko hamarkadan ______________________________________.

60ko hamarkada berezia izan zen gizartearen arlo askotan, hori jakina da, eta Brasilen ere sumatu zuten hori. Hezkuntza mailan esaterako, analfabetoenganako kezka zabaldu zen; alfabetatu gabeko milaka pertsonak letren mundura nola sartu zen galdera nagusia, eta galdera horri erantzuna emateko aparteko iaiotasuna erakutsi zuen Paulo Freirek.

- 60ko hamarkadan _____________________________________ .

Helduentzako hezkuntza

Ordu arteko metodo ezagun eta ofizialei ihes eginez, Freirek helduen alfabetizaziorako metodo berri bat asmatu zuen bere taldearekin. Freirek asmatu metodoak ikasleen hitzetatik eta esaldietatik abiatuta lantzea zituen ikasgaiak. Taldeari egokitutako hiztegia eratzen zuen, bakoitzaren emozio mailaren araberako hitzak baliatuta. Hitz arrotzak erabili barik gertutasunez landu zituen eskolak ikasleek azkar ikas zezaten. Helduentzako alfabetizazio metodoak arrakasta itzela izan zuen.

- Freireren metodo berria/-k ___________________________ .

Garai hartan Brasilen militarrek agintzen zuten, eta 1964an Gobernuak erabaki zuen Freirek asmatu zuen metodoa oso arriskutsua zela, jendeak azkarregi ikasten zuelako. Horrelakorik ez zen komeni, Gobernuaren ustez. Brasilgo hainbat lurraldetan jende xumeak 40 egunetan ikasten zuen irakurtzen eta idazten. Brasilgo Gobernuak hori ikusita, Freire eta bere taldea komunistatzat jo zituen; Freire bera kartzelan sartu zuten hilabete batzuetarako, eta gero, Brasil utzi eta erbesterako bideari ekin zion.

- Brasilgo Gobernuak Freireren metodoa _________________________________ .

Txilen zela, bere metodoa martxan jartzen hasi zen, eta ekarpen horiek argitaratu zizkioten. Garai hartakoa da Zapalduaren pedagogia liburua -geroago etorriko ziren Hezkuntza, askatasunaren praktika, eta beste batzuk-. Freire sona handia hartzen hasi zen, besteak beste, EEBBetatik ere deitu zutelako bere metodoa ager zezan. Brasilen, aldiz, bere liburuek debekaturik jarraitzen dute, eta hori dela eta, Zapalduaren pedagogia gaztelaniaz argitaratu zuen. Munduko herrialde askotan bere lana erakutsi zuen, eta hura oinarritzat hartu zuten hainbatetan.

-Txilen bizi zela ___________________________________ .

Urteek aurrera egin zuten heinean, ordea, Paulo Freire pedagogo iraultzailea bigarren mailan geratu zen, hirugarren munduko autore gisa edo. Agintearen guneetatik Freireri eman zioten iraultzaile kutsuak ere pisu astunegia izan zuen mundu mailako hezkuntzan eredu izaten jarraitzeko.
Guztira 14 urte eman zituen erbestean emaztea eta bost seme-alabekin, horietatik azken 12ak Geneban, Suitzan.

- Hainbat urteren buruan Paulo Freire/-k ______________________________ .

Indepentzia bidean dauden herrialdeak

Paulo Freireren pedagogia lanak indepentzia bidean zeuden herrialdeetan izan zuen bereziki garrantzia. Hala, Afrika eta Erdialdeko Amerikako herrialde askotatik deitu zuten, biztanleen alfabetizazio maila igo nahian. Ginea Bissaun, Nikaraguan, El Salvadorren, Guatemalan eta beste herrialde askotan eragin nabarmena izan zuen hezkuntza sarea.

- Paulo Freireren pedagogiak hainbat herrialderen _____________________________ .

Erlijioari buruz oso gutxitan hitz egiten zuen Paulo Freirek; ongi ezagutzen zutenek, ordea, kristaua zela diote. Askapenaren teologia landu zutenengandik hurbil ikusten zuen bere burua. Bere pedagogi eta filosofi ikuspegia azterturik, Askapenaren teologia baino haratago joan zela nabarmentzen dute Freireren esanak entzun zituzten hainbatek. Beharbada ez genuke Paulo Freire pedagogi metodo baten sortzaile gisa ezagutzera eman behar; agian, zuzenagoa litzateke esatea pedagogi ikuspegi oso baten ondorioa izan zela asmatu zuen metodoa. Ospea eta izena eman zion metodoa abiapuntua besterik ez zen izan, bere filosofi ikuspegia iturri pedagogiko agortezina izan baitzen bizirik iraun zuen artean. Nolanahi ere, hasieran helduentzako sortu zuen metodoak ia edozein baldintzatan gauzatzeko gaitasuna erakutsi zuen, eta egun oraindik ere erakusten du.

- Freiren pedagogia metodoa/-k __________________________ .

Izan ere, egungo pedagogiaren baitan ere antzeman daiteke Paulo Freireren itzala. Esaterako, askatasunean mugitzen diren lurraldeetako hezkuntzan, demokratikoki saiatzen den hezkuntzan, ikasleen eta irakasleen arteko harremana zaintzen duenean, pertsona eta herriaren hitza entzuten dakien pedagogian...
Duela bi urtetik hona Paulo Freireren ekarpenei garrantzi handiago ematen hasi zaie Europa eta EEBBetan. Arlo ugaritan jazotzen den modura, hezkuntzan ere EEBBek ezarri dituzte joerak, eta azken urteetan Freire modan jarri da han. Beraz, Paulo Freire pedagogia modernoaren aita gisa azalarazi dute.

- Azken urteotan Paulo Freire/-ren ________________________________ .